സാമ്പത്തികം

കേരളം ഉപഭോകൃതസംസ്ഥാനം ആയാണ് അറിയപ്പെടുന്നത്. തൃശ്ശൂരും ഈ ഗണത്തിൽപ്പെടുന്നു. ചില്ലറവ്യാപാരം(റീട്ടെയിൽബിസിനസ്) ജില്ലയിലെ വലിയ ബിസിനസും നഗരത്തിലെ പ്രധാന വരുമാനസ്രോതസ്സുമായി കണക്കാക്കുന്നു. ജുവല്ലറി, ടെക്സ്റ്റൈൽ ചില്ലറവ്യാപാരം ഇവിടെ സജീവമാണ്. ആഭരണങ്ങളുടേയും ടെക്സ്റ്റൈൽവ്യവസായത്തിന്റേയും ദക്ഷിണേന്ത്യയിലെ പ്രധാനകേന്ദ്രങ്ങളിലൊന്നായി തൃശ്ശൂർ മാറിയിട്ടുണ്ട്. പ്രമുഖ ജ്വല്ലറി-ടെക്സ്റ്റൈൽ ഗ്രൂപ്പുകളിൽ ഭൂരിഭാഗവും തൃശ്ശൂരിൽ ഔട്ട്‍ലെറ്റുകൾ സ്ഥാപിക്കുകയും ആയിരക്കണക്കിന് തൊഴിലാളികൾക്ക് ജോലി നൽകുകയും ചെയ്തുവരുന്നു.

തൃശ്ശൂരിലെ പ്രധാന വ്യവസായങ്ങളിലൊന്നായ കളിമൺവ്യവസായം (ടൈൽവ്യവസായം) നിരവധി പേർക്ക് തൊഴിൽ നൽകുന്ന മേഖലയാണ്. ഇവിടുത്തെ ടൈൽവ്യവസായത്തിന് 100 വർഷത്തിലേറെ പാരമ്പര്യമുണ്ട്. തൃശ്ശൂരിൽ 160 ഓളം ടൈൽഫാക്ടറികൾ ഇപ്പോൾ പ്രവർത്തിക്കുന്നു. പുതുക്കാട്, ഒല്ലൂർ, ആമ്പല്ലൂർ,തലോർ, കരുവനൂർ എന്നിവയാണ് തൃശ്ശൂരിലെ ടൈൽവ്യവസായത്തിന്റെ പ്രധാനകേന്ദ്രങ്ങൾ. ടൈൽസിന്റെ ഗുണനിലവാരവും ഉത്പാദനവും മെച്ചപ്പെടുത്താൻ ഇവിടെ ഇറ്റാലിയൻ സാങ്കേതികവിദ്യ ഉപയോഗപ്പെടുത്തിവരുന്നു.